Genesis 49
Jacob ko kuriang 12 marak nungaram
1Jacob ko kuriang suen la nunga auram ale balam, “Tai biguwural se mel tom udagi ningimik te aratomonko mu ani ninga manikko.2“Nina Jacob ko kuriang, tai biguwural daigal ale
den balik wore ninguru ikialko,
ninga nenet Israel den balukko wore kawus mal ikialko.
3“Reuben, ni aninga kuriang laun.
Tom ani kulak sokel ago bagerem la ni girem bilangerem.
Se ni kuriang imi ningi kari laun, sokel ago.
4Bare nika bagara ko munan mu yu lom wuli ago kapa kam, ale ni kari laun ko iwita me bagerko.
Duap, ni ani ago ko me nguangerem, ni aga ura dungan imet ilak anirem.
5“Simeon Levi launuria.
Nuna kager mel gisan ale te kager daong betesan.
6Nononga ikia betemonko mu ani me ningi namirikko.
Nononga biguwura te mu ani me nongorak daigekko.
Mu awuk, tom nongomang magara mu te kari nunga moman se kueman.
Ikia mena, kolara nunumi patowara mu te bulmakau nusuwik pisi batagorman.
7Nononga nongomang magara memek nunguningkiri, koma am nunga irokko.
Ani nunga parasuwurik se Israel sor suen la te kariimet ningi nama dagi dagi geragomonko.
8“Judah, nika launuria nika nip patawomonko.
Nika kager kari nodogotak te nunga ilupko.
Ka launuria kema dugu te taromon ale ni la nip patawomonko.
9Judah mu lion iwita.
Noko na inang moso ale kuwim te peleso, taga aniso numi dingumuso.
Mel bo nu ilak kolara me ikiso.
10Judah king ko sikir suwik ilagala ko kusumuri iluwoso.
Ale iluwuruk la, ko Kotam nunguning tairuk iluwok ale kariimet suen la nunga bituokko.
11Judah ko mayang waen suen biya.
Nu ko donkey gotek mayang waen ningo nunguningkiri wore ago kalo beteso.
Ale ko guang waen gueyam wore te anuso.
12Nu waen naso se ko motam gueyam,
se amin naso se kore siraram.
13“Zebulun mu langi gagi duap te bagurukko.
Ko saun korang dal te aratu yeromonko karogo.
Ko ali ko tom nama Sidon wonong te aratukko.
14“Issachar mu nu donkey sokel ago iwita.
Bare nu mel kota giokko wore ningi kaposo ale am ani lagoso.
15Nu ali mu arigiso, ali ningo maso, te noman sapurukko yawara ma balso,
ale eng mu te kari nobowa ningi nunga dungan ura beteso, mel ikup giso ago namoso.
16“Dan mu nu ko kariimet suen biya nunga bituokko.
Nuna Israel kariimet saki bagasan mu turan bagomonko.
17Dan mu nu urer ma daong ago wore turan, lage due karogo bagoso.
Se kari horse te taiso mu nu tengeso ale horse mu suwik te usiso se kari mu daguloso, iwitata nu bagurukko.
18“Kari Biya, ani ni aga sangaruko kimi kisisam.
19“Gad mu tere kari taimon ilak kagermonko.
Bare nu nunga moruk ale nunga karukko.
20“Asher ko ali mu na ningo ningo te aratukko.
Se na inang mu king naukko koma.
21“Naphtali mu deer iwita kota ko ikia te geraga lagurukko.
Ale ko kuriang ningo ningo aratomonko.
22“Joseph mu mayang waen yu duap te tarigiwoso, ale ko nunguning suen biya ago.
Se ko kower maiso namoso taiso ale ningam ko kar kiaso,
ale kuwim biyala nu tamarum tuso, iwitata nu bagurukko.
23Joseph ko kager kari noko ninguru nongomang magaram se
nunga daga wol ago mu te ili kagerman.
24Bare Jacob ko Kaem Joseph saongam se
noko daga tagiram mu me supakaso,
ko kuting me kuakaso.
Jacob ko Kaem mu sokel karogo.
Nu Israel kariimet nunga Bitua Kari, nunga Saonga Kari.
25Joseph, nika niet ko Kaem ni ninguru ka sangukko,
Kaem Sokel Karogo borta ni marak kisokko.
Noko marak suen biya ni Joseph kisokko:
tuwik te munan kisok, yu ali ningi kisok,
kuriang suen biya kisok, belelek sipsip mel suen biya kisokko.
26
Ani nika niet marak kisisam imi mu aora garagar, se sokel ago,
mu duruk bibiya tom suen biya sokel ago anisan mu nunga kiaram.
Marak suen la imi Joseph kote la nama sapurukko,
ale nu ko launuria ningi kari gira bagurukko.
27“Benjamin mu kausik diwang iwita kagerarukko;
tumongola nu ko kager kari arungu kagerso ale nunga moso maguwuso,
ale bainga ningi mel nongote giso mu tuteso ale saki alo nungarso guruguso.”
28Se imitang Jacob ko kuriang 12, se nunga gue te Israel kariimet motam 12. Se nunga nonet den imitang nunga maonam. Ale suwan suwan tom udagi te nunga bagara aguwaya ko iki se marak nungaram.
Jacob kueram se mutim tuguman
29Udagi te Jacob ko kuriang den imi nunga maonam, “Aitak aninga kariimet giriman kueman mu nongote namirikko. Se ani manga gogong aga ait angatak kueman se ningi nunga awuman mu te agarak nama aga beteralko. Manga gogong mu Heth kari Ephron ko ali te, 30sor Machpelah Mamre koma worem bausa mu te aniso. Mu Canaan ali sor. Ali, se manga gogong, mu Abraham Ephron kote dia tam, ale balam, ‘Imitang te ana kari kuemon mu nunga mutim tugunakko,’ mam. 31Nuna ulengkala Abraham ko nuwus Sarah ilak umu te nunga mutim tuguman. Ale Isaac ko nuwus Rebecca ilak umu te tala nunga mutim tuguman, se ani aga imet Leah kuwim suwanta nukung te la mutim tugumem. 32Abraham ali se manga gogong umu Heth kari nongote dia tam. Se ani umutang te tala aga mutim tugumalko.”33Jacob den mu ko kuriang nunga maonam, mu nu suwik tagi patatuwu kualala ko kuwim te awuram, ale kueram.
Copyright information for
WSK